體重排行榜

Mike - 11.8 lbs

Huey - 9.6 lbs

Milk - 9.6 lbs

Botti - 6.8 lbs

又愛又恨

蘿蔔佬對 Botti 簡直是又愛又恨.

Botti 好鍾意跟住蘿蔔佬, 經常跟隨住佢的左右, 所以深得蘿蔔佬的歡心. 可是同一時間 Botti 又係頑皮小搗蛋一名, 最鍾意瞓係蘿蔔佬心愛的 hi fi cable 上面, 由於體重的關係, 有些 cable 已經俾 Botti 壓斷壓鬆而需要修理或更換.

係我地屋企, 經常可以聽到蘿蔔佬對住 Botti 又鬧又錫的聲音. 一時聽到 "哎吔, 你壓壞晒我 d 線啦!", 一時又會聽到 "Botti, come to papa."

我的第一本自家貓貓寫真集

養貓養了剛剛三年的時間, 由最初養一隻貓開始上癮到現今養了四隻貓. 貓貓的各樣動態和趣怪表情, 激發了我要學習攝影的意向. 没有供讀專業課程, trial and error 就是我的學習方法. 三年來拍下了不少自家貓貓的作品, 大部份都是見不得人的, 只有少部份的相片可以拍出貓貓的魅力.

近年來多了公司代客製作各款相集, 心思思之下, 決定替自家貓貓編印一本寫真集作為私人珍藏, 相集已經編印完畢並已寄出, 預計八月初就可以收到我的第一本自家貓貓寫真集.

鬼靈精怪

Botti 係一名世界仔兼鬼靈精 . . . . .

Botti 每朝起身一定香吻滿屋飛, 錫我鼻鼻, lam 我咀咀同眼眼, 然後去錫蘿蔔佬鼻鼻. 見到哥哥姐姐又係逢貓必錫.

Botti 一見我入廚房就誓必跟 . . 跟 . . .跟 . . . . . 仲要不停 hi 我對腳, 皆因佢以為又有得開餐.

Botti 一見 Mike 去兇 Huey 哥哥時, 就會即刻做 "架娘", 一係撲埋去 Mike 處撩 Mike 玩, 一係飛奔去 Huey 哥哥處, 自己擋係 Mike 同 Huey 的中間扮 lam 毛.

Botti 日日都同 Mike and Milk 玩打交, 由於 Mike 太過粗暴, 所以初時 Botti 成日慘叫救命, 久而久之, 我一聽到 Botti 慘叫, 就會大聲喝止 Mike. 而家 Botti 已經大隻仔, 但每次 Mike 同佢玩打交時, Botti 都會慘叫定先, 等 Mike 未能及時出口咬就已經俾我喝住.

雞肝粉

Huey 同 Botti 成為了好兄弟之後, 關係好到連自己的貓糧都可以當禮物去交換. Botti 知道 Huey 鍾意食幼貓糧, 於是自己一粒都唔食就全兜糧讓俾哥哥食. 哥哥亦都唔客氣, 一於唔食自己兜成貓糧, 由得 Botti 慢慢食. 為免 Botti 唔夠營養 Huey 腸胃敏感, 我唯有兩個糧兜都有幼貓糧同埋成貓糧. 兩個星期後, Huey 重了少少, 但 Botti 的磅數不變.

Botti 現時六個月大, 是發育時期, 點樣先可以令佢得到多 d 營養呢? 經契爺契媽的推介, 我買咗呢 jar 雞肝粉, 每日 sprinkle 少少落乾糧面, Botti 即刻食多咗幼貓糧. 希望持續食用後, Botti 可以回復返每星期增磅少少的計劃.

出前一丁再現身

星期六美容後, Huey 又再次展示了他的出前一丁 luen 毛毛.

越睇越覺得肚餓, 結果我們就煮了一個出前一丁做宵夜.

報失

遺失 milk teeth 兩隻, 如有尋獲, 重酬 !

每隔兩三天我都會用手指 "liu" 起貓貓咀邊, 用手指掂下佢地的牙同牙肉, 等佢地習慣下俾人檢查牙齒或點上 oral gel. 六月尾的某一天, 突然發現 Botti 的 milk teeth 不見了, 取而代之的是 "老虎牙" 一對.

Playboy

Botti 有幾鍾意玩? 佢可以唔瞓唔食, 但係就唔可以無得玩! 睇下佢玩到索晒氣, 好似狗仔咁打開口伸脷仔來抖氣, 仍然要索住氣來玩 !!!!!

生活中之最重要

在 Huey 的生活中最重要的三件事:
1. 瞓
2. 瞓
3. 食

在 Milk 的生活中最重要的三件事:
1. 食
2. 食
3. 瞓

在 Mike 的生活中最重要的三件事:
1. 嗲
2. 食
3. 瞓

在 Botti 的生活中最重要的三件事:
1. 玩
2. 玩
3. 玩

Huey 金榜題名

雷曉兒同學金榜題名

http://learning.sohu.com/s2007/07tzs/?stra=%u96F7%u66C9%u5152