Animal Kingdom Veterinary Hospital

話說超級曳貓 Botti 在星期二晚開始無咁活躍，沒有跳高跳低，沒有極速狂奔，沒有撩事鬥 "飛"。只見佢一入貓廁所就坐咗幾分鐘，出來後就喵了兩聲，然後又 fee 咗兩聲，檢查過無 "output"。

我覺得 Botti 有問題，於是開始 "人釘貓" 去觀察佢的一舉一動，見到佢夜晚又入貓廁所，今次坐咗十分鐘，出來後又係喵兩聲，又 fee 兩下，即刻檢查下又係無 pee 又無 poo。唔通 Botti 有尿道炎 ? 我開始擔心，諗住觀察多一晚，如果明早仍然無尿尿的話，我會即刻帶佢去睇獸醫。

星期三朝早，見到 Botti 入貓廁所坐咗十二分鐘，又係無得尿尿。於是我立即上 facebook 問下有無朋友有可靠的獸醫介紹，因為我家貓豬御用獸醫經常 full booking，就算 walk-in 都要等最少半天才可以攝到位。如果屋企附近有可靠的獸醫就可以有多個選擇，以備不時之需。

最後好彩有朋友介紹 Animal Kingdom Veterinary Hospital，位於銅鑼灣威菲路道，離屋企都算近，只需 10 - 15 分鐘車程。朋友話 Dr. Victor Chun 秦醫生係一個好醫生，於是我決定一試。

事實証明 Dr. Chun 唔單只係一個好醫生，仲係一個好有愛心好有責任心的醫生。Dr. Chun 診斷 Botti 期間，佢會詳細解釋所有步驟，之後又解釋病況及治療的方法。Botti 接返屋企之後，Dr. Chun 仍然會打電話問下 Botti 的情況，很難得會有肯主動跟進病人情況的醫生。

多謝秦醫生以及動物王國醫院的護士姐姐們，幫我照顧咗 Botti 一日。

除咗食葯，Botti 要食兩個月的處方糧，作用係溶解尿液裏面的晶體。

因為治療期間需要吊鹽水，所以 Botti 右手要剷去少少毛。

離遠睇都唔係好覺啫。