Ranne 寄宿生活的回顧

Ranne 同 Mike 是名符其實的親生/孖生兄妹，佢地同父同母兼且同一胎。當佢地一歲半時就分開咗，因為 Mike 來咗我屋企而 Ranne 就留係陳宅。Ranne 自去年 12 月中來到蘿蔔家庭做寄宿生，不知不覺已經 5 個月，Ranne 同蘿蔔貓貓的相處完全無問題。

Ranne 同 Huey - 佢地簡直就好似一對小情侶咁，日日都糖似豆，少見一分鐘 Ranne 就會四圍揾 Huey，so sweet。

Ranne 同 Milk - 佢地兩個都話自己係最靚的貓囡，於是間中會進行 K.O. 比賽或妳追我逐。

Ranne 同 Botti - 佢地相處無乜火花，只會間中爭下食物搶下玩具玩下追逐戰。

Ranne 同 Jheena - 呢一對姐妹花認真 wulala ! 可能身型 size 差唔多，所以玩得最多最癲係佢地兩個。屋企成日見到有兩個影飛來飛去，原來係佢地係度極度狂奔妳追我逐，間中仲要玩埋伏擊，首先呢埋然後突然跳出來，誓言要嚇到對方爆膽。

Ranne 同 Mike - 點講點睇佢地真係雙生兒，連性格都一模一樣，勁鍾意痴住人，又成日要人摸，有時唔為意無摸佢地就出聲鬧人。

Ranne 下個月就要返娘家，結束係蘿蔔家庭的寄宿生活。希望 Ranne 返到自己屋企之後唔會忘記係蘿蔔家庭 5 個月來的點點滴滴，希望將來我地去陳宅探佢時 Ranne 仲記得蘿蔔老豆同蘿蔔媽咪。