貓貓百態之沖涼篇

整個冬天都無幫蘿蔔貓貓沖過涼，貓毛開始有 “立手” 的感覺，於是蘿蔔佬同我決定向難度挑戰，係復活節假期的最後一天幫其中三隻貓貓沖涼 – Milk, Mike, Botti。

全部貓貓都做齊所有沖涼步驟 – pre-cleansing + one step + shampoo + rinse。

Milk – 好乖，全程坐定定，任沖任洗。

Mike – 唔掂，完全發晒顛，不停咁好大力掙扎，又咬又出爪，有幾次嚇到我要叫蘿蔔佬放手由得佢，免得俾佢咬傷或抓傷。結果我地以最快速度，幾經辛苦，終於沖完涼。我知道佢好驚沖涼，差不多半年無沖過涼，相信日後我要對佢勤加訓練，每一個月沖涼一次，開始時步驟盡量減到最少 (one step + rinse)，等佢習慣咗先加多一個 step (pre-cleansing + one step + rinse)，再等佢習慣埋先沖齊所有 steps。

Botti – 麻麻地乖，初期少少掙扎想 “走佬”，後期好無奈咁坐定定任沖任洗，不過同一時間不停 “吽吽” 聲以示不滿。

嚇餐死

為咗預備貓展，上星期六係屋企幫 Jheena 沖涼。首先 pre-cleansing cream 去油，然後 one step，跟住 shampoo，最後用 texturizing shampoo，之後用暖風機 “烘乾”。

沖涼後香噴噴的 Jheena 竟然受到臭 bun bun 的 Botti 所妒忌，Botti 耐心等候到我同蘿蔔佬入房就寢時，窮追兼猛打 Jheena。蘿蔔佬一聽到 “獅” 殺聲已經即時衝出客廳，只見 Botti 剛剛由 Jheena 身邊跑開扮唔關佢事，Mike + Milk 係另一邊瞓緊覺。

貓貓打交係平常事，通常都係 “拳霸上身” 或 “踢頭咬頸” 之類，我起初以為今次都會係咁。但突然間我發覺好唔妥，因為 Jheena 發晒顛咁追住自己隻右後腳來 lam，佢隻後腳係 fing 下 fing 下咁係地下拖行。當時的情況真係好嚇人，我好驚，我同蘿蔔佬都無晒主見，Jheena 隻腳好似甩咗骹咁。我即時 (凌晨 1 時 50 分) call Anna，我問駛唔駛帶 Jheena 睇急症，Anna 話可以睇定 d 先，等第二朝先決定。佢話如果貓貓甩骹或斷骨的話，第二日情況都會一樣，到時就要睇醫生兼照 x ray，如果貓貓只係扭親或撞親，第二日情況會好好多。於是我就用張氈包住 Jheena 然後放佢入籠，希望佢可以抖一晚唔好週圍走。Jheena 係籠入面不停慘叫同埋 lam 腳，聽得出係痛苦的叫聲，於是我地成晚都好担心 Jheena，大家無瞓過，時不時行埋籠邊摸下安慰下 Jheena。

直到朝早 7 點左右，Jheena 的叫聲開始正常返，變返好似貓仔咁 “蚊滋喵喵喵”，於是我地放佢出籠，佢即時跳上我地床行來行去，然後一半時間瞓係我身邊一半時間霸咗我個枕頭瞓。結果我地全家都瞓到中午時份先起身，我繼續觀察 Jheena 的 “每一步”，可以話係回復正常，於是我同蘿蔔佬都放心出街，去 Anna 舖頭親自匯報情況，然後順道係隔離餐廳買咗一隻麵包蟹一隻龍蝦返屋企做晚餐。