貓傢俬

最近家中的多了一件貓傢俬 - mike。佢大部份時間都係瞓覺，一係瞓我地張床，一係就瞓我個身。

玩到顛貓

而家 jheena 變成蘿蔔家族中最爛玩的貓貓 . . .


預備 . . . . .


attack! (出晒爪)


玩到攰時只會就地休息片刻，之後又要繼續。

驚青 huey

huey 越來越無胆，越來越驚青。每日 "自由行" 時間，huey 只會呢埋係 hifi 後面，希望其他貓貓 "你睇我唔到"。


huey 驚青到連家中最細的 jheena 都怕 . . . . . 不過暫時無 feee jheena，huey 只係唔鍾意佢行過。

貓貓體重排行榜 2008-05-13

huey - 9.4 lbs
milk - 9.8 lbs
mike - 12.2 lbs
botti - 11.4 lbs
jheena - 8.2 lbs

打針的後遺症

上週末帶 Mike 同 Botti 去打預防針，回家後 Huey，Milk，Jheena 勁聞佢地。唔知係咪佢地身上有陣診所味，Huey 竟然唔怕佢地；又唔知係咪佢地俾獸醫舞完一輪驚魂未定，Mike 同 Botti 竟然勁痴住 Huey 哥哥。Huey，Mike，Botti 可以和平共處，一齊係窗台上瞓覺覺，而 Botti 竟然係瞓覺前幫 Huey 哥哥 lam 頭仔 . . . . . 真係好似奇蹟一樣呀！

喂！咪咁開心住呀 . . . . . 因為第二日已經全部 back to normal 啦！

唔通打針都會有後遺症？ Hahaha . . .

惡女

milk - 各位熟朋友一定知道 milk 最鍾意先嗲後咬蘿蔔佬，在亳無因由之下，蘿蔔佬唯有好亞 Q 咁同自己講，話 milk 愛佢先會咬佢。

jheena - 佢已經晉升成為蘿蔔家的小霸王，對住 botti 大灰熊都無有怕，如果 botti 飲水飲慢 d，或者 botti 個肥大身驅有少少阻住佢行路，jheena 即刻出手兜頭打 botti 一下。

蘿蔔人 - 俗語有話，怕老婆先會有發達o架 ! 所以為咗蘿蔔家族，我唯有委屈自己扮惡女。

充滿動感的貓貓

經常練習 "飛躍" 動作


結果有一個 long looooooooooong body

青出於藍

千祈咪俾 jheena 咁乖巧的甫士扼咗你/妳。

自從 jheena 第一日到達蘿蔔家，佢就好鍾意痴住 botti，跟出跟入，唔單只學齊 botti 的頑皮本領，簡直就係青出於藍。

咬鞋帶 - 唔單只咬斷鞋帶咁簡單，仲要咬到條鞋帶又濕又霉。
偷毛毛棒 - 唔單只識得不問自取，仲識得收埋支毛毛棒唔俾我發現。
無時停 - 每日都不停咁跑來跑去，跳高跳低，係患上 "過度活躍症" 的典型例子。

養貓的煩惱

養貓就快四年，最大的煩惱有二 :

1) 貓糧
2) 貓砂

貓糧 – 因為家中有幼貓和成貓，成貓之中又有腸胃敏感的和需要控制體重的，所以家中儲存的乾糧最少都有四至五款 – 幼貓糧，普通成貓糧，腸胃敏感糧，體重控制糧，天然配方糧。最頭痛係貓貓需要食適合自己的貓糧，可惜經常係事與願違，幼貓偏偏愛食成貓糧，肥胖貓貓偷食幼貓糧。

貓砂 – 呢個一直係我最大的煩惱 !!!!! 試用過多款不同類型的貓砂 – 礙結砂，木片砂 ，木粒砂，豆腐砂，粟米砂，紙粒砂，紙條砂。

礙結砂 – 好處係容易剷走排泄物，襟用；唔好處係木地板變成沙池，尤其是貓貓用雙手玩水兜後，木地板佈滿沙腳印。
木片砂 – 好處係勁吸味；唔好處係貓砂輕身，長毛貓痴到成身都係貓砂。
木粒砂 – 好處係勁吸味，貓砂大粒唔會痴落貓毛；唔好處係遇濕會變成粉末，我家其中一隻貓貓對木砂敏感，手掌又紅又腫，嚴重時會有損口兼結焦。
豆腐砂 – 好處係貓貓唔覺意食落肚都無害；唔好處係吸味麻麻，價錢較貴。
粟米砂 – 好處係貓貓唔覺意食落肚都無害；唔好處係吸味麻麻，容易有谷牛。
紙粒砂 – 好處係大粒唔會痴落貓毛；唔好處係吸味麻麻，濕後變成糊狀兼痴盤底。
紙條砂 – 好處係實心紙條狀，唔會痴落貓毛，濕後紙質仍然結實唔會變糊狀；唔好處係唔會礙結。

近兩年我一直都係用紙粒砂，由於我家有長毛貓亦有短毛貓，更加有一隻喜歡 “炒” 砂的貓貓；試想想剛換了一盆新砂，貓貓去 peepee，然後將濕砂炒到散晒，攪到成盆新砂都有濕砂兼尿味。唉，結果係 . . . 又要換過一盆新砂。

今個月初我開始試用紙條砂，效果唔錯，唔會痴落貓毛，ok 吸味，由於濕後紙質仍然結實，所以就算貓貓狂炒貓砂，我都唔需要從新換過全部貓砂。

日日都係潑水節

今個星期係泰國的潑水節 Songkran Festival，亦即泰國的新年。蘿蔔家庭無須等到特定日子都可以有潑水節，事關 jheena 日日都會係屋企慶祝呢個節日! 以前好整齊的食水兜，而家每分每秒都一定要用毛巾墊底。

兔兔貓

旺角金魚街的寵物店經常見到不同品種的可愛兔仔出售，其中一款甚為可愛的長毛兔仔叫作 "貓貓兔"。

其實我家亦有五隻 "兔兔貓" . . . . .


huey 兔兔貓


milk 兔兔貓


mike 兔兔貓


botti 兔兔貓


jheena 兔兔貓

究竟邊個最似真正的兔兔呢?

最享受的時刻

由於 huey 較為不享受 "群貓生活"，所以每天定時我都會將 mike，botti，jheena 間中加上 milk 關於房內，讓 huey 可以享受一下 "不被打擾" 的時刻。


mike 每天最享受的就是可以躺於我們的懷抱內，時不時 lam 下我們的下巴 or 咀咀。

成熟男

一歲後的 botti，好像忽然成熟了不少 . . . . .


呢張好有 hobo feel (註: hobo 係 botti 的外公)


頭大咗少少圓咗 d d，不過身型就暴漲咗好多。

朋友到訪後遺症

昨天茱莉亞姐姐及彼得哥哥到訪蘿蔔家庭，同蘿蔔貓貓們玩得十分開心。茱莉亞姐姐例牌向 botti 不停抽水 (話個秘密你地知，其實茱莉亞最愛 milk 的甜美外型，可惜眼見 milk 如何又抓又咬蘿蔔爸爸隻手，嚇得佢對 milk 公主 "敢看不敢摸")，彼得就不停用相機左拍右攝，捕捉蘿蔔貓貓佻皮的一面。

兩小時之後 . . . . .


mike 攰到咁o既樣 . . .

來個 close up

jheena 都攰到唔理儀態

milk 公主點攰都要保持淑女形象

botti 玩極都唔攰，繼續係地板 "典來典去"

朋友到訪時，huey 例牌只會露一面就繼續我行我素，所以無時無刻都處於優閒狀態。

貓貓駁髮

相處咗咁耐，huey 淨係同 milk 夾得來，佢同 mike，botti，jheena，總係三句唔埋就出手，唔通 huey 唔鍾意短毛貓 ? 於是我把心一橫，決定拎三隻短毛貓去駁髮，變身成為三隻長毛貓，今趟 huey 再無藉口唔啋佢地啦 !

清閒的復活節假期 (手機相片)

Jheena 瞓覺時係大昏迷，任你點攪都唔會醒。

Botti 的睡姿唔係吊對腳出來，就係瞓到個頭 "long" 咗出來。

雖然 Huey 大部份時間都閉關，其實佢無時無刻都 "目及" 到實我地的一舉一動。

Mike 行到邊瞓到邊 。

Milk 最愛攤係窗台晒太陽。

體重排行榜 2008-03-25

Huey 9.2 lbs (2-12 記錄 9.8 lbs)
Milk 9.8 lbs (2-12 記錄 9.8 lbs)
Mike 11.8 lbs (2-12 記錄 12 lbs)
Botti 11.4 lbs (2-12 記錄 10.8 lbs)
Jheena 7 lbs (2-12 記錄 5.2 lbs)

自從所有貓貓都變成大隻 B 後，我由年初開始減少餵濕糧的次數，由每兩天一次減至現時每星期一次。見到 Huey 體重繼續下降，開始有些擔心。擔心他是否有病，擔心他是否不開心引致食慾不振，擔心他會否營養不足，等等。Huey 是一隻十分感性的貓貓，亦是一隻十分揀飲擇食的貓貓。

只有獨處或與 Milk 共處，Huey 才會發出嗲功，以及表現出頑皮的一面。如有 Mike 及 Botti 共處一室，Huey 就會選擇 "閉關自守"，免得招致 "被貓圍毆" 的下場。

Huey 最愛濕糧及麥芽味吐毛膏，對於有益健康的三文魚油或營養膏，有助增肥的 meg-a-cal，Huey 統統不愛。

Easter Fest - 金裝貓糧

上週末去咗太古城 shopping，好耐無逛 Apita 的超市，見到有新的外國牌子濕糧，崇洋心態之下，決定買俾貓大爺貓小姐們慶祝復活節。


買咗兩款味道 : (1) 三文魚 + 蝦 (2) 火雞肉 + 羊肉

底部 description 全部德文 or 其他外文，無英文，唔識睇。

免治肉 + 少少肉汁

試食報告 :

Botti & Jheena - 鍾意食 (基本上佢地無乜濕糧唔食)

Huey & Milk - ok 鍾意食

Mike - 麻麻地鍾意食

飛魚轉身

Botti 原來除咗跨欄叻，"游乾水" 都好叻。今次講的游乾水並非指打麻雀，我係講緊唔駛用真水的游泳運動。

話說近日 Botti 經常練習游乾水，而且更會使出殺手鐧 "飛魚轉身"。

Botti 企係泳池 (餐枱) 邊集中精神，預備開始 "游乾水"。唏! Botti 一下子就跳入乾水泳池 (地下)，一路拼命游 (跑) 向對岸 (大門口)，係距離對面池邊 (木門) 大約一呎左右，Botti 就立刻使出一招 "飛魚轉身"，凌空跳起 + 180 度轉身 + 雙腳用力撐一下池邊 (木門)，姿勢簡直無懈可擊，好順利咁就完成咗呢個完美的轉身動作。

小食多滋味

Pattyhouse 近期又返咗新食品 . . . . .


Evolve 天然濕糧，海鮮味 (蘿蔔貓貓全部都鍾意食)，雞味 (未試)，火雞味 (未試)。
濕糧係肉醬形狀，蘿蔔貓貓向來唔 hou 肉醬濕糧，掂都唔掂，但由於 evolve 係自然糧，所以姑且一試。點知蘿蔔貓貓出奇地肯食喎，仲要食完自己個兜，走去食埋人地個兜o添。
試食結果 : 又係清晒兜。

小食未開袋，已經有貓想偷食。

IRIS 雞味小食 jello。我係驚張貓媽，所以我唔敢一貓餵一粒，我驚會 "芹" 親貓貓，於是一粒 jello 分五小份。

試食結果 : 貓貓鍾意食到 . . . . . 當我都想試食一小粒時，未及放入自己口裏，蘿蔔貓貓已經衝到我面前搶住食。為免俾貓貓毀容，我唯有唔敢偷食。

反斗星二號

Jheena 係 pattyhouse 時係一隻好乖巧的貓貓，其他同胎貓貓都係活躍型，所以 Jheena 成日自己玩，開餐又唔夠爭，同胎裏面佢係最細小的一隻貓咪。

返到蘿蔔屋企之後，可能 "群" 得曵貓多，而家變成反斗星二號。學曉咗 "咬鞋帶"，"咬皮帶"，"咬紙"，"咬手"，"咬頭髮"，我舖床冚時佢一定會係床面四圍跑四圍跳，誓要攪攪陣。

試緊新鏡，突然多咗 "第二者"。

樣樣事都關佢事。

鍾意八八卦，成日四圍望，等待 "出擊"。

最鍾意玩偷襲，專門偷襲 Milk 家姐，Mike 哥哥，Botti 哥哥，我隻手，同埋我 d 頭髮。

平時最愛練 yoga，鍾意縮骨呢埋呢個筒筒入面。

連瞓覺的姿勢都寧捨百厭。

貓囡會嗲 d ?

繼 Jheena 晚晚做我的毛毛頸巾之後，Milk 近日都一改以往瞓覺的習慣，唔再攬住我隻腳瞓，改為瞓係我懷抱之內。過去三晚，Huey 同 Milk 入我房瞓。Huey 一如往常自己瞓窗台，Milk 初時瞓係我枕頭上面，半夜就自己 “捐” 入我張被裏面，將個頭枕住我隻手臂瞓咗一晚。昨晚我讓蘿蔔佬瞓我的位置，測試下 Milk 的反應會否不同，點知 milk 一樣係咁瞓喎，先瞓枕頭，之後自己 “捐” 入張被裏面瞓，氹得蘿蔔佬今朝起身笑騎騎，一副 “勁冧” 的樣子 !

體重排行榜 2008-02-12

Huey - 9.8 lbs (較一個月前輕了 0.2 lb)
Milk - 9.8 lbs (無變)
Mike - 12 lbs (較一個月前輕了 0.2 lb)
Botti - 10.8 lbs (較一個月前重了 0.8 lb)
Jheena - 5.2 lbs (較兩星期前重了 0.6 lb)

親近妳

除咗玩樂時間 (真正玩到亞媽都唔認得)，jheena 好喜歡親近我地。每晚放工返到屋企，佢總係跟住哥哥姐姐排隊，排隊等我同蘿蔔佬摸下佢地，問下佢地今日乖唔乖囉。招呼過後，貓貓又到咗玩樂時間。

玩到差不多 10 點，大部份的貓貓都預備就寢。huey 一早已經霸住菠蘿屋或南瓜屋，係入面瞓到反晒肚。milk 好怕凍，佢鍾意痴住部暖爐瞓。botti 有時會自己一個係貓樹頂層瞓，有時會瞓係 hi fi 架裏面。mike 例牌要我抱住佢瞓，佢真係好似人 BB 咁要我抱住瞓。jheena 同 mike 一樣, 鍾意瞓係我度。於是我個身就俾 mike 霸住，對腳就屬於 jheena 的。

到真正瞓覺的時間，huey 同 jheena 會同我地一齊瞓。huey 鍾意自己一個係窗台瞓，jheena 會痴住我瞓，通常首先會瞓係我心口上面瞓，一小時後會 "sir" 咗落我臂變裏面瞓，有時甚至會瞓係我條頸度扮 fur scarf。

昨晚半夜醒來，發現自己有些呼吸困難，並非氣管收縮，似是有障礙物。打開對眼，發現眼前一團物體，原來 jheena 瞓咗係我塊面度 ! ! ! 佢個 pat pat 放正係我個鼻同口的位置，唔怪得我抖唔到氣啦 !

行孖咇

Jheena 返咗蘿蔔家只有一個星期，Botti 同 Jheena 已經越來越夾，時常形影不離。佢地 friend 到經常一齊瞓覺，一齊 play fight，一齊 "鼠" 入廚房 "二重唱"，不停 "喵喵喵" 提示我要餵佢地食營養膏。

昨天 Jheena 竟然跟埋 Botti 一齊搗蛋攪破壞，話晒 Botti 係大貓兼 IQ 頗高，於是佢就點o靚妹 Jheena 出手，自己就坐享其成。

Botti：係o刺，就係咁用手推，推多幾下就得o既o刺。推跌個盒落地，我地先有得玩層層疊o架!

貓貓也瘋狂

我甚少買小食給貓貓，因為坊間的小食有太多的味精，對貓貓的健康不大好。Pattyhouse 最近入了新小食，由美國直接入口的 Cat-Man-Doo Dried Bonita Flakes。我參考過網頁 http://www.catmandoo.biz/，此貓貓小食 100% 天然無添加，無味精，無人造色素，無防腐劑，高疍白質，低脂。聽 Anna 講，她家中眾多貓貓，只有兩隻貓貓不大喜歡，其餘十多隻貓貓簡直 "勁鍾意食"。

於是我上星期五買了兩盒回家，一打開 sealed packing，貓貓已經一擁而上，我家全部貓貓都搶住食。我同蘿蔔佬用齊四隻手都未能滿足五隻貓貓的為食行動，Mike 更跳上梳化， 直接將頭 "ong" 落小食兜大啖食。如果我們不加以阻止或不停止餵食行動，相信一盒 bonita flakes 可於十五份鐘內一掃而空。

蘿蔔貓貓話：我為 flakes 狂！

數數手指

踏入 2008 年，不經不覺之間已經養貓養了第四個年，Huey 同 Milk 今年都會四歲了。

數一數手指，由 2004 年到 2008 年，原來我每年都會添貓貓一隻 :

2004 年 8 月 - milk
2005 年 1 月 - huey
2006 年 7 月 - mike
2007 年 5 月 - botti
2008 年 1 月 - jheena